Volapük paspiköl fa hiel Igor Wasilewski
Ün del 31id mäzula yela 1879 datuval: Johann Martin Schleyer jafom fomi balid püka dü neit nenslipöfik. Opübom poso atosi in gased okik el 'Sionsharfe'.
Mö yels ti luldegs latikumo dokan: Arie de Jong bevobom fomami nulädikum püka. Ün del 31 mäzula yela 1929 nunom, das vobod okik blümon.
Cifal telid ün tim et binom hiel: Albert Sleumer (cifalacal: yels 1912 - 1948).
Hiel Arie de Jong visitom omi ün prilul yela 1929 ad jonön ome seki voboda okik (is mutob vestigön, kiöpo profäsoran Sleumer älödom).
Zifil: Wienacht in Jveizän. Is söl Jakob Sprenger lödom (kredob, das binon lödatop okik). Ün setul yela 1929 dokan: Arie de Jong e cifal ettimik: Albert Sleumer visitoms omi ad bespikön dinis. Hiel Jakob Sprenger ovedom suno cifal kilid, ab te dü yels kil (1948 - 1950).
Dels 17id jüesa 19id setula 1929 - Volapükans kil bespikoms fütüri püka.
Plü gebob Volapüki, plü stigedik binon. Kredob, das Volapükan veratik söton i sevön jenotemi Volapüka gudiko. Senälob, das utos, kelosi neodobs nutimo, binon pato jenotem Volapüka perevidöl, keli gebobs. Atos sinifon, das sötobs dedietön timi patik ad timäd, kel äprimon ün yel 1929, kuratiko mö yels luldeg pos daved püka rigik. Ekö zeil obik: dugolön da nüms mögo mödiküns elas 'Volapükagased pro Nedänapükans' e 'Vög Volapüka' ad tuvön notetis distöfik, balugiko sagölo - ad vedön i Volapükavan!
Ün dels at suvo reidob 'Volapükagasedi pro Nedänapükans', pato demü yegeds jenotemi teföls. Reidob nunis, nemis Volapükanas e länas u zifas, kö älödons. Läns cifik binons Nedän, Jveizän e Deütän, ab ömna logob i Brasiläni. Kanoy tuvön us jenöfotis nitedik distöfik, klu älabob tikamagoti ad primön sökodi tiädü 'Xamobsös noli obsik jenotema Volapükik', kö penoböv säkädilis e gespikis brefik. Logob osi as okskilükam balugik, ab if oklülädos binön nitedik, mögos das opübob valikosi fütüro fomü yeged bal.
E buükob ad dedietön timi mödadilo Volapüke perevidöl primü yel 1929, cedob das doküms püka rigik bundanons, ab doküms latikum binons nemödikums.
Xamobsös noli jenotema Volapüka:
Säk 1: Dokan Arie de Jong äbinom presidan diläda valemik feda Vpaklubas. Kin äbinon-li sekretan?
jonülöd gespiki Gespik: Men et äbinon J.G.M. Reijnders.
Säk 2: In zif kinik söl: A. A. Moll van Santbergen, vipresidan Volapükakluba valemik Nedänik älödom-li?
jonülöd gespiki Gespik: Söl: A. A. Moll van Santbergen älödom in zif: Den Haag.
Säk 3: In 'Volapükagased pro Nedänapükans' ädaloy ad pübön notedis. Liomödotidna noted ot äkanon-li pubön?
jonülöd gespiki Gespik: Te balna in yelod bal. (Ab if äviloy pübön oni pluna, äbinos mögik ifü votükam bosik ninäda ota.)
Säk 4: Tidabuk famik fa dokan Arie de Jong tiädü 'Leerboek der Wereldtaal' äpubon ün yel 1932. Kis äbinon-li nem dabüköpa, kel ädabükon oni?
jonülöd gespiki Gespik: Nem dabüköpa et äbinon 'Repko'
Säk 5: Ün yel: 1934 hiel Johann Schmidt, kel älödom in vilag: Weisskirchen am Taunus äsedom kobanefe Vpakluba valemik Nedänik glidis de Volapükans anik vilaga et. Volapükans liomödotik äsedons-li glidis?
jonülöd gespiki Gespik: Äbinons Volapükans fol.
Säk 6: In nüm balid 'Volapükagaseda pro Nedänapükans', kel äpubon ün yel: 1932 äkanoy reidön dö suäm, keli änedoy pelön ad lebonedön gasedi at. Äbinons klads kil: pro Nedänans, pro foginänans, e pro limans 'Volapükakluba valemik Nedänik'. Liomödoto ämutoy-li pelön ma klad alik?
jonülöd gespiki Gespik: Suäm pro Nedänans äbinon flons Nedänik: 2 a yelod, suäm pro foginänans äbinon flons Nedänik: 2,25 a yelod, klubalimans no ämutons pelön, ab limanamafräd äbinon flons Nedänik: 2,50 a yel. Nüm balid gaseda päsedon glatiko lü nitedäbs valik.
Säk 7: Tü del balid yanula yela: 1890 'Volapükaklub valemik Nedänik' pibligidon pro tüp semik, pos fin kela liedo kodü def büada jiregik no pälunükumon, e sekü atos äfinikon ad dabinön dü yels degtel (poso ädönulifükon). Tüp yelas e mulas liomödotiks pälonädon-li pro klub at ün yel: 1890?
jonülöd gespiki Gespik: Tüp pälonädöl äbinon yels: 29 e muls: 11, efe jü del balid dekula yela: 1919.
Säk 8: Cifal kimik älödom-li seimüpo in Ligtänstän?
jonülöd gespiki Gespik: Jakob Sprenger älödom in zif: Eschen (Ligtänstän) dü yels: 1930-1933. Ab dü lif oka älödom gretadilo in Jveizän.
Säk 9: In Volapükamuf ädabinom man nog bal labü nem: 'Schleyer'. Kim äbinom-li? Kitopo älödom-li?
jonülöd gespiki Gespik: Äbinom liman 'Diläda valemik feda Volapükaklubas', älödom in Gernsbach/Murgtal (Deutän). Nem omik äbinon Hannsmartin Schleyer.
Johann Martin Schleyer [1831 - 1912], datuval Volapüka [1879 - 1912]
Albert Sleumer [1876 - 1964], cifal telid Volapüka [1912 - 1948]
Dokan Arie de Jong [1865 - 1957], revidan gretik Volapüka
Jakob Sprenger [1872 - 1952], cifal kilid Volapüka [1948 - 1950]